गुन्हेगारीचा पर्दाफाश….!
बार्शी रोड वरील पाच दुकाने सील ;मालमत्ता कर थकल्याने पालिकेची कारवाई
लातूर/प्रतिनिधी: वारंवार सूचना करून आणि नोटिसा देऊनही मालमत्ता कर भरला जात नसल्यामुळे महापालिकेच्या वतीने बार्शी रोड वरील पाच दुकाने सील करण्यात आले.
लातूर महानगरपालिकेने वसुली मोहीम तीव्र केली आहे.शहरातील नागरिक आणि व्यापाऱ्यांकडे कोट्यवधी रुपयांचा मालमत्ता कर थकीत आहे.त्याची वसुली करण्यासाठी पालिका प्रयत्नशील आहे.ज्यांच्याकडे मोठ्या प्रमाणात कर थकलेला आहे त्यांना पालिकेकडून वारंवार नोटिसा दिल्या जात आहेत.असे असतानाही संबंधितांकडून करांचा भरणा केला जात नाही.त्यामुळे पालिकेने मालमत्तांची जप्ती आणि सील करण्याची कारवाई सुरू केली आहे.
मंगळवार (दि.३१ जानेवारी )अशाच एका कारवाईत बार्शी रोड वरील पाच दुकाने सील करण्यात आले. बार्शी रोड वरील मालमत्ता क्र. A2/5530 या मालमत्तेवर २,१२,२३८/- ( दोन लक्ष बारा हजार दोनशे अडोतीस रु.) मनपा चा कर अनेक दिवसापासून थकलेला होता. पालिकेकडून वारंवार सुचना व नोटिसा देऊनही कर न भरल्यामुळे या मालमत्तेतील पाच दुकाने सील करण्यात आले.झोन A चे क्षेत्रीय अधिकारी कलीम शेख , पथक प्रमुख प्रदीप जोगदंड , सहाय्यक पथक प्रमुख, शिवराज शिंदे, अमित म्हेत्रे, प्रदीप खंदाडे, गणेश देवणीकर वसुली लिपीक अंगद शिंदे यांनी ही कारवाई केली.
शहरातील नागरिक व व्यावसायिकांकडे मोठ्या प्रमाणात मालमत्ता कराची थकबाकी आहे.नागरिक व व्यापाऱ्यांनी आपल्याकडील करांचा भरणा पालिकेकडे लवकरात लवकर करावा.जे नागरिक,व्यापारी आपला कर भरणार नाहीत त्यांच्यावर मालमत्ता जप्तीची / सील करण्याची कारवाई केली जाणार आहे.कर भरून पालिकेला सहकार्य करावे, असे आवाहन करण्यात आले आहे.