रेणापूरात भाजपानेच विकास कामे केली भाजपालाच मत देणार मतदारांची भावना

रेणापूरात भाजपानेच विकास कामे केली भाजपालाच मत देणार मतदारांची भावना

                   लातूर दि. २६ - रेणापूर नगरपंचायत निवडणुकीत भारतीय जनता पक्षाला मतदारांचा उत्स्फूर्त पाठिंबा लाभत आहे. रेणापूर शहरात विकासाची कामे भाजपानेच केली असून शहराच्या प्रगतीसाठी आणि हितासाठी भाजपाशिवाय पर्याय नाही. भाजपला मत म्हणजे विकासाला मत, अशा भावना नगराध्यक्षापदाच्या भाजपाच्या उमेदवार श्रीमती शोभाताई आकनगिरे यांच्याशी बोलताना मतदार बंधू भगिनी व्यक्त करत आहेत.

          रेणापूर नगरपंचायतीच्या निवडणुकीत लातूर ग्रामीणचे आ. रमेशआप्पा कराड यांच्या नेतृत्वात भाजपाच्या नगराध्यक्षपदाच्या उमेदवार श्रीमती शोभाताई आकनगिरे यांनी बुधवारी सकाळी सेवादास नगर, काळेवाडी, संजय नगर, संभाजीनगर, राजे नगर या भागात प्रचार पदयात्रा काढून मतदारांशी संवाद साधला. घरोघर जाऊन मतदारांच्या भेटी घेतल्या. ठिकठिकाणी महिलांनी त्यांना औक्षण केले. अनेक ठिकाणी नगराध्यक्ष पदाच्या उमेदवार शोभाताई आकनगिरे यांच्यावर पुष्पवृष्टी करण्यात आली.

          यावेळी मतदारांनी रेणापुर शहरातील विविध विकासाची कामे, विविध प्रभागाचा विकास भाजपाच्या नेतृत्वामुळे झाल्याचे श्रीमती आकनगिरे यांच्याशी बोलताना सांगितले. सेवादास नगर या परिसरात नगरपंचायतीत भाजपाची सत्ता आल्यानंतर गटारी आणि रस्त्यांची कामे मोठ्या प्रमाणात झाली. तांड्यातील बहुतांश सर्व रहिवाशांना प्रधानमंत्री आवास योजनेतून घरे मिळाली. कुडाच्या घरात राहणाऱ्यांना आरसीसी सिमेंट काँक्रीटच्या घरात राहायला मिळाले असल्याचे समाधान अनेक मतदारांनी बोलून दाखविले.

          काळेवाडी भागात महिलांनी शोभाताईंना भेटण्यासाठी शेकडोंच्या संख्येने गर्दी केली होती. नगराध्यक्ष पदाच्या उमेदवार श्रीमती शोभाताई आकनगिरे यांनी गावातील देवीचे मंदिर, विठ्ठल रुक्मिणी मंदिर, खंडोबा मंदिर येथे दर्शन घेतले. रहिवाशांशी चर्चाही केली. ठिकठिकाणी महिलांनी मोठ्या उत्साहात स्वागत केले.

          रेणापूर शहरात मुख्य रस्त्यालगत असणाऱ्या संजय नगर, संभाजीनगर व राजे नगर या परिसरातही मतदारांशी संवाद साधण्यासाठी प्रचार फेरी काढण्यात आली. या परिसरात राहणाऱ्या नागरिकांनी आपल्या भावना व्यक्त करताना रेणापूर नगरपंचायतीत पुन्हा एकदा भाजपाची सत्ता आणण्याचा निर्धार श्रीमती आकनगिरे यांच्याशी बोलताना व्यक्त केला.

          या पदयात्रेदरम्यान भाजपाच्या उमेदवार सुनिता मधुकर बस्तापुरे, खैरूनिसा मारूफ आतार यांच्यासह पदाधिकारी, कार्यकर्ते, नागरिक, युवक, मतदार आणि कार्यकर्त्यांची मोठ्या संख्येने उपस्थिती होती.